В Реґєтові нова таблиця. Майме надію остатня

Як поінформували нашу редакцию жытелі Реґєтова, в віторок, 12. вересня/септембра т.р., в місце знищеной хуліґанами двоязычной, польско-лемківской таблиці з назвом села Реґєтів была поставлена нова.

Припомнийме, што лемківска част з назвом села Реґєтів была уж бодай трикратні нищена, а остаточні довершыньом того, што вандалі зачали перше, было выдертя доцяп фарбы деякым острым нарядьом. Тот прикрий інцидент, про котрий голосно зробило ся не лем в русиньскым середовиску, прошол правдоподібно вночы з 26./27. липця/юлия т.р. Нову таблицю помінено аж тепер.

Як про нашу редакцию повторні розповіл єден з жытелів села – […] хоц надія уж давно пропала, і так щыро віриме вшыткы ту в селі, же веце нашы таблиці не будут нищены. Звідуючы про правдоподібных справців, дальше почули сме, што в поблизкым Шквіртным, якє днес є такой в більшости заселене осадниками, декотры з молодых люди мают сильно нацийоналистичне наставліня, а при тым антилемківскы погляды.

Непокій може будути днешнє тихе призволіня власти і брак реакциі деякых кругів на насильне ламаня прав нацийональных і етнічных меншын в Польщы. Подібны варварскы атакы сут прямуваны заєдно і в другы меншыны, якы миротворні хочут жыти в єдній державі.

Фот. 14. вересня/септембра т.р.