В Пряшові собі припомянуть Михала Чабалу

3-го авґуста минуло 15 років од смерти Михала Чабалы, котрый быв неодділительнов частьов пряшівской вытварной сцены, но і жывота пряшівскых уліць. Тоту річніцю вырішыло припомянути собі Обчаньске здружіня Русиньскый коморный театер, котре із той нагоды приготовило выставку творів Чабалы.

14-го септембра 2017-го року орбуде ся в пряшівскій літературній кавярні Віола подія під назвов Спомина на Міша. Буде то вернісаж выставкы мало знамых рисунків Чабалы із пріватной збіркы Мілана Хомы, котрый із Чабалом быв близкый приятель. В рамках вернісажі прийдуть на Михала Чабалу окрім Мілана Хомы заспоминати і карікатуріста Федор Віцо, фотоґраф Ладіслав Цупер і бывша директорка Шарішской ґалерії в Пряшові Марта Гребічкова. Проґрам вернісажі буде доповненый о відеопроєкції з Михалом Чабалом – промітаня фотоґрафій з молодшых років, архівных заберів з умелцьом і документу, котрый з Чабалом зробив куратор Музею модерного уменя Енді Варгола в Меджілабірцях Михал Бицько. Запрошіня на подію прияла і Анна Порачова, котра обогатить проґрам народнов співанков.

Михал Чабала быв академічный малярь, котрый ся народив 4-го фебруара 1941-ім р. в селі русиньскім селі Нижні Чабины недалеко Меджілаборець. В рр. 1958 – 1962 штудовав у Бырні мальбу в архітектурі. Потім в рр. 1962 – 1963 робив пропаґачного вытварника в Музею україньской културы у Свіднику. Од р. 1963 аж до р. 1969 штудовав на Высокій школі вытварных умень в Братіславі у професорів Міллого, Мудроха і Матєйкы. По куртій карьєрі на Вытварній катедрі Педаґоґічной факулты в Тырнаві у 1972-ім році выбрав собі жывот свободного умелця. Быв остатнім богемом пряшівской вытварной сцены. Од 1974-го року быв членом Союзу словацькых вытварных умелців.

У творчости Михала Чабалы, котру презентовав на майже 60-ох колектівных і 6-ох окремых выставках, доміновали пейзажы, но любив мальовати і театралны мотівы, якостны были його портреты ці закутя. На пейзаж мав Чабала выняткове чутя. Умер 3-го авґуста 2002 р. у Пряшові.

Вернісаж 14-го септембра зачінать о 17.00 год. і выставку буде мож в кавярні Віола видіти до 14-го октобра 2017-го року.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА