Днес і заран в Ґорлицях праздник священномученика Максима

Днес, 5. вересня/септембра, служеном о 18.00 год. Всеночном зачнут ся в ґорлицкым православным кафедральным соборі св. Тройці богослужыня звязаны з дньом памяти священномученика Максима Ґорлицкого. Заран, 6. вересня/септембра, богослужыня будут проходити од 6.00 год., найперше служена буде ранішня Літургія, а по ній, о год. 8.30, буде чытаний Акафіст перед мощами святого. Головну Божественну Літургію при участи архієреів заплянувано на 10.00 год. 

Ден памяти святого лемківской землі о. Максима Сандовича што рік притігат вірных православной Церкви не лем з Лемковины, але і з дальшых части Польщы та світа. В другых православных храмах сут в тот ден правлены богослужыня.

Пару дни тому, в суботу 2. вересня/септембра, была служена Архієрейска Божеска Літургія в Іновцях на Пряшівскій Руси, яку очелил предстоятель Православной Церкви Чешскых Земель і Словациі владыка Рoстислав. Тамтышній храм є під покровительством св. пророка Ілиі та священномученика Максима. Відеореляция з реченых богослужынь доступна є гев.