В Осаднім будуть споминати на депортованых Жыдів

В селі Осадне будуть 10-го септембра 2017-го року споминати на жытелів жыдівской народности, котры жыли в сниньскім реґіоні, і з котрых векшына была насилно депортована до концентрачных лаґрів почас Другой світовой войны. Інформовав о тім словацькый денник Korzár.

Подію орґанізує Европске збералтельске общество, Кріпта вояків Осадне і село Осадне. Як раз в Осаднім быв почас войны православный священик Констанстін Махлайчік, котрый ся намагав выратовати жыдівске населіня перед депортаціями.

„Подія з назвов Меджі трьома граніцями буде проходити в Осаднім і зато, бо недалеко села є бывша тригранічна теріторія войнового Німецька, Словакії і Мадярьска, котра в тім часі розділа і ту жыюче населіня того реґіону непотрібнов граніцьов. Окрім того в Осаднім діяв православный духовный Константін Махлайчік, котрый выдавав хрестны листы жыдівскым гражданам, і так мав намагу выратовати їх жывоты. В тутешній церьковній матриці є  записаных коло 70 Жыдів із Гуменного, Михаловець, Сечовець і далшых міст выходной Словакії, о котрых ся не знать, ці ся тым його чіном выратовали перед смертьов,“ повів про денник орґанізатор події, православный священик Петро Сорока.

Про тых, котры будуть мати інтерес брати участь на події, піде в тот день рано о 8.30 год. автобус із Снины до Осадного, одкыль ся піде піше на триграніча. Пополідне на учаснтиків од 15.00 чекать проґрам із трьома лекціями, якы будуть односити ся до всокоченых писемных документів о Жыдах в реґіоні Снины, жыдівскых цінтерях і ратованю Жыдів выдаваньом хрестных листів в Осаднім. На тых лекціях бы мали брати участь і представителі жыдівской реліґійной общіны на Словакії, конзул Ізраіля з Кошыць і проходити буде і куртый жыдівскый обряд за помершых. Вшыткы три лекції буде мож прочітати і в книжці, котра буде в рамках завершіня події святочно презентована.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА