«Слово» – 12-та неділя по Сошетствії Святого Духа – неділя, 9.00 год.

Євангеліє днешньой неділі нам говорить о чоловікови, котрый приходить за Ісусом з барз важным вопросом: Учітелю добрый, што робити, жебы-м набыв вічный жывот? Тот чоловік не приходить покушати ани їмати Ісуса на словах. Щіро глядать одповідь, прото Ісус, котрый чітать в його внутрі як в отвореній книзі, йому одповідать. Хочеш ввойти до жывота? Дотримуй заповіди. Но він сі думав, же може є даяка інша важна заповідь о якій не знать. Но Ісус му говорить о заповідях декалоґу: не убий, не чуджолож, не крадь, люб свого ближнього. Тот молодый чоловік цілый натішеный одповідать: але тадь тото я дотримав од юности, што мі іщі треба? Тогды му Ісус, видячі основну хвороту його душы, говорить: Кідь хочеш быти досконалый – продай свій маєток, дай бідным і будеш мати богаство в небі, потім прийдь і мене наслідуй. Но тот одходить смутный, бо мав великый маєток. Тота привязаность ку земному, тото прягнутя мати веце, по ґр. плеонексія, было на причіні, же тот молодый чоловік не выхосновав і не прияв Ісусовой помочі. Тото євангеліє учіть і нас якым злом є привязаня ку земному, чоловіку заперать двері до Царьства, бо цілый його час крутить ся лем коло матеріалного. Не дасть му подумати на вічность, на смерть, на то, што буде по смерти. Не доволює му любити ани ближнього, бо в другім видить не ближнього, але конкурента, перешкоджіня ці нагоду ку обогачіню. Кілько зла, нечестности, кровли, воєн, зниченых жывотів мать на своїм конті страсть – привязаня ку земному? І так просьме о то, жебы хоснованя того земного нас не позбыло через привязаня ку ньому того небесного. Слава Ісусу Хрісту!

В неділю, 27. серпня/авґуста 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 27. серпня/авґуста 2017 р. о 15.00, 20.00 год. і 28. серпня/авґуста 0 2.00 год. за русиньскым часом.

Фото: Хрістос в славі. Євангеліє із 16-го столітя. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА