Стріча з Русинами з Камюнкы, Великого Липника і Литмановы

В найблизшым часі буде проходила дальша част проєкту Музыка без границ. 26-27. серпня/авґуста в Щавници одбуде ся пленерова подія пн. Конец літа з Музыком без границ, в котрій участ возмут представникы жытелів обшыри Пєнін, а то: пєніньскы ґуралі, сусіды Русины з Великого Липника, Камюнкы і Литмановы та репрезентанты Шляхтовской Руси.

Буде то четверта запоряд інтеґрацийно-артистична стріча, реалізувана в рамках проєкту. Прдешы одбыли ся в маю, червци і кіньом липця, коли в Явірках зорґанізувано подію в памят 70-літя акциі Вісла. Вчас тых стріч запрезентуваны были дотеперішні ефекты досліджынь.

Конец літа… проходил буде в цікавых обставинах, не в дакым домі культуры ци світлици, а на самым вершку горы Палениця в шаласі Ґронь на высокости 722 м нрм. Певністю, буде то сприятливе ґу тому, жебы голос нюс ся на цілы горы, а буде ся мало што нести, понеже на реченым вершку выступят ґрупы: Барвінок, Майдан, Вородай. Окрем того почути буде мож музыку Яська Кубіка, буде час на спільну бесіду о музыці і не лем та час на спільне погощыня. Передвиджено аж і музычну несподіванку.

Проєкт Музыка без границ дофінансуваний єст зо середків Міністра Культуры і Народовой Спадковины, його координаторком єст др Юстина Чонстка-Клапита.

Фот. горі – мапка з місцевостями обнятыма проєктом.