«Слово» – Праздник Преображенія – неділя, 9.00 год.

Пережываме праздник Преображенія. Ісус бере своїх трьох учеників і выводить їх на гору Тавор, де ся перед нима преобразив (змінив свою подобу). Його тварь завсвітила як сонце а облечіня побіліло як світло. Приходять Мойсей і Ілія і бісідують з Ним о Його одході (смерти) в Єрусалимі. Потім їх затінює хмара і звучіть голос Отця: Тото є мій любый Сын, Його слухайте! Ісус бере своїх учеників, жебы їм одкрыти часточку свого Божества. Апостолы смотрили на Хріста як на чоловіка, многому не розумили. Ісус указує, же є справды Бог і чоловік. Приходять Мойсей і Ілія – великы ревнителі за Божу славу в Старім завіті, котры потверджують Хрістово Божество. А єдночасно указують своїм появліньом, же Ісус є владыка жывых (Ілія) і мертвых (Мойсей). А тыж Ісус указує як бы в передобразі славу, котра чекать тых, котры зістануть Йому вірнима. Отець потверджує Хрістово Божество – Тото є мій любый Сын! Тот праздник і про нас є праздником посилы, підкріпліня в нашых проблемах, тяжкых сітуаціях. Смотьме і мы на гору Тавор, і тогды легше перенесеме тото вшытко, знаючі, же тото земне є курте, лем до часу. Но тамта слава перебывать вічно. Ісус о ній говрить на іншім місці: Тогды справедливы просвітять ся над сонце в славі свойого Отця. Най тоты слова суть адресованы і нам вшыткым за нашу вірность Господу в тім поземнім жывоті. Слава Ісусу Хрісту!

В неділю, 20. серпня/авґуста 2017 р., о 9.00 год. проґрам «Слово», котрый реалізує єромонах Маркіян ЧСВВ. Повторіня 20. серпня/авґуста 2017 р. о 15.00, 20.00 год. і 21. серпня/авґуста 0 2.00 год. за русиньскым часом.

Фото: Александер Іванов, Преображеніє Господнє. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА