Порядкы на лемківскых цмонтерях

Єпархіяльний Осередок Православной Культуры ЕЛПІС з Ґорлиц посліднім часом провюл етап порядковых і інвентаризацийных робіт на парох цмонтерях в лемківскых селах – інформує про тото ітнернетовий сайт ПАПЦ, orthodox.pl. 

В 70. річницю акциі Вісла вольонтеры ЕЛПІС-у довєдна з ґорлицкым Клюбом Любителів Лемковины провели порядковы роботы на цмонтери в неістнючій Радоцині, а в липци/юлию т.р. завдякы ґрантови з Народового Інституту Спадковины, Клюб Любителів Лемковины, при спертю Осередка ЕЛПІС, провели вольонтерскій табір, в рамках котрого были проведены інвентаризацийны роботы на цмонтерях в Бліхнарці, Высовій, Ганчовій, Ріпках та Ставишы.

Єдном з форм сучасной інвентаризациі лемківскых цмонтерів є сотворений інтернетовий сайт www.lemcmentarze.pl, на якым найти мож інформациі нт. цмонтерів, находячых ся в селах середньой Лемковины, а днес будучых в границях ґмін Устя Рускє, Ропа, Санкова, Липинкы і Ґорлиці. На вірутальній мапі мож находити на дану назву села і прочытати історичну ноту про нього, а дальше перейти до опису цмонтеря, з поданьом інформаций, односячых ся до його положыня, теперішнього виду, окружыня і – што основне для темы лемківскых цмонтерів – з поданьом інвентаризацийного списку памятників, находячых ся на поєдным сельскым теметові. Прим. на цмонтери в Устю Рускым зъінветаризуваны сут 34 памятникы, до котрых долучены сут фотоґрафіі іх представляючы та дальшы детальны описы з даном інформацийом про ориґінальну транскрипцию, находячу ся на памятнику. По проведіню консервациі на сайті при памятнику дана є самособом інформация про статус актуального виду. Сайт є розвиваний і фурт дополняний о новы інформациі і описы. Неодолга буде мож взріти на ним опрацуваня тогорічной інвентаризациі.

фот. цмонтір в Біличній