Варгол має мальованый родостром

6-го авґуста собі припомянеме 89 років од народжіня Енді Варгола. Із той нагоды собі Музей модерного уменя Енді Варгола в Меджілабірцях припомяне того вызначного умелця русиньского походжіня в родиннім дусі. Зато в понедільок 7-го авґуста 2017-го року буде од 14.00 год. в просторах той інштітуції проходити святочна інавґурація Родострому Енді Варгола, на котрого реалізацію дав грошы зряджователь музею – Пряшівскый самосправный край.

Од думкы до реалізації

Авторами родострому суть двоми професіоналны вытварници Мартіна Блащакова і Мартін Кудла, котры ся окрім свойой властной умелецькой творчости занимають і мальованыма родостромами. Од думкы зробити родостром Варгола по його реалізацію перешло коло девять місяців, з тым, же само здобываня інформацій і мальованя тырвало умелцям пів рока. Родостром быв конзултованый із Михалом Бицьком, єдным із основателів музею і його сучасным куратором.

Як інформує в пресовій справі Кармен Ціліпова, кураторка музею, головнов концепційов ручно мальованого родострому є візаулным способом представити історічну ґенезу Енді Варгола. На першый погляд мала кількость предків в родостромі є подля Ціліповой повязана із історійов русиньского етніка, котре было тяжко пробоване беспрестайным пересельованьом.

Інфо-статічна мапа

Єден із авторів, Мартін Кудла про нашу редакцію говорить:

„Є то скоріше така інфо-статічна мапа жывота Варгола. Было тяжше іти даяк веце до історії предків Енді Варгола, бо стары матрикы ся не всокотили. Зато по пораді із нашым ґенеалоґом Михалом Разусом і веджіньом Музею модероного уменя Енді Варгола сьме вырішыли, же заміряме ся і на коріня умелця, но будеме візуалізовати головно його жывот і діяня. Зачали сьме самособов його предками, пак суть там родічі, братя, а далше сьме там дали вызначны жывотны пункты, місця повязаны з ним.“

В інформачно-умелецько-естетічній візуалній мапі, родостромі, мож найти наприклад образок із родиска Варголовых родічів – села Микова, родный дім Вархоловых в Пітсбурґу, але і славный ателъєр Factory, котрый мав Варгол в Ню Йорку. Так само там мож найти ербы Миковой, Пітсбурґу, Земліньской жупы, під котру Микова належала, ці Пряшівской ґрекокатолицькой єпархії (днесь уж архієпархії), кідьже Вархоловы были ґрекокатолици і село Микова належало і належыть під пряшівского єпіскопа. Но і самособов є в родостромі і русиньскый ерб, кідьже Варгол быв Русином.

„Родостром є оріґіналный, окрім того, же не іде о класічный родостром, і тым, же сьме коло творіня выходили із класічных технік, котры Енді хосновав на зачатку свойой умелецькой карьєры. Не є хоснована техніка сітьодруку, но суть там технікы, котры Енді видів дома од свойой мамы, котра была так само здібна вытварничка інсітного характеру. Тоты технікы ся пізніше вказали в його властній творчости. Кідь сьме ішли по корінях Варгола, мали сьме намагу тоты коріня вказати і в техніці вытворіня його родострому. На фоні мож видіти мотівы Ендіго рождественной яличкы (твор Christmas Tree позн. ред.), што было іншпіроване рисунками його мамы, суть там різны характерістічны пантликы, єден є докінця зробленый з його Кембеловой поливкы. Просто суть там многы одказы на Варгола, дакотры з них і гуморного характеру,“ говорить Кудла.

Самособов на родостромі не бракують ани знамы бананы, позолочены, котры припоминають обкладку платні од ґрупы  The Velvet Underground, яку про ґрупу Варгол вытворив.

Родостром є зробленый на патінованім папірю, котрый має розмір 115 на 180 цм. Дакотры елементы окрашіня суть позолочены 24-каратным золотом. Од понеділька буде родостром частьов сталой експозіції в Музею модерного уменя Енді Варгола.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА