Варгольова серіґрафіка вытягнена з коморы роковой звізды

Неєден хотіл бы мати хоц деяку, хоц маленьку роботу короля поп-арту, Русина Енді Варголя. Щестя тото має інча знана звізда нашых часів – Еліс Купер, менуваний як єден з творців шок-рока та горрор рока, якій здобыл славу іщы в 70. роках ХХ ст.

Як інформуют великы світовы медия, Купер нашол, а по правді вытягнул, Варгольове діло по веце як 40 роках. Серіґрафіка, про яку бесіда, зове ся «Мале електричне кресло» (анґ. Little Electric Chair). Днес, свіжо по запрезентуваню єй світу по роках непамяти, експерты выціняют єй вартіст на пару до парунадцетьох милийонів дулярів. А ціна може быти высша, беручы од увагы шырокє заінтересуваня темом. Сам Еліс Купер уж заповіл, же покля што не хоче єй продати.

Інтересуюча є істория самого затрачыня, забытя діла. Комора, в якій робота была найдена, то просто єдно з поміщынь, в котрым Купер тримат своє музычне ґратя та предметы хоснуваны ним вчас концертів. «Мале електричне кресло» было звинене 40 років в тубу і так собі лежало, понеже рокмен Купер забыл, же колиси достал Варгольовий твір од свойой фраіркы – Сінді Ланґ. Сама робота была вытягнена вдяка добрій памяти мамы та менаджера Еліс Купера, якы нашли діло. Котрисого разу, слухаючы доповіди про высокы ціны, якы треба днес платити за Варгольовы творы, менаджер Купера сой припомнул, што тот же єдну з серіґрафік достал. Кєд бы не тота ситуация, певно дальше лежала бы она без слідів істніня.

Артисты познали ся в модным в 70. роках ХХ ст. нюйоркскым клюбі Студийо 54 і скоро остали добрыма камаратями. Як підкрисляют знавці темы 70. років, о кілько Купер был уж товды добрі знаний в музычным світі, о тілько Варголь аж зачынал свою карєру і помалы перебиял ся до великого світа. Пак король поп-арту сотворил діло, якому дал мено «Мале електричне кресло». А чом так? Вшытко лем зато, што Еліс Купер вчас своіх концертів хоснувал на сцені як раз електричне кресло, як єден з реквізитів. Принаймі так днес тлумачат тото самы заінтересуваны. Серіґрафіка «Мале електричне кресло» была придбана Куперовом фраірком лем за 2,5 тис. дулярів.