Добряньскый має нову деревяну скулптуру

В днях 17-го аж 22-го юлія 2017-го року проходив в Зборові, в окресі Бардейов, 4-ый річник Деревоскулптаторьского сімпозія, котрого головным орґанізатором є Обчаньске здружіня ШОК – шпорт, освіта, култура (O. z. Šok – šport, osveta, kultúra). Почас нецілого тыждня вісем скулптарорів в Парку Шередія в Зборові, перед Културным домом, робило на шестьох скулптурах. В суботу, 22-го юлія, проходила во вечурных годинах святочна вернісаж свіжых творів.

В рамках події так выникли деревяны пластікы, в єднім припаді в комбінації з металом, Андрея Будіша, Драка – сімболу села Зборов, Ракоційовой алеї стовкы лип, Святого Еґідія і Великоморавского памятного стовпа. Сімпозій приніс і подарунок Русинам на Словакії, кідь єден із умелців вытворив деревяну скулптуру русиньского народного будителя, першого посланця в Угорьскім сеймі за Вышнє Угорьско, бойовника за права Русинів і вшыткых славяньскых народів в Австро-Угорьскій імепрії – Адолфа Добряньского.

З думков вытворити на тогорічнім сімпозію скулптуру Добряньского пришли орґанізаторы, конкретно Ян Шуркала, котрый є і депутатом в Містнім заступительстві в Зборові. Тот ословив Округлый стіл Русинів Словеньска, кідьже як раз тота платформа выголосила із надоы 200-ой річніці од народжіня будителя Рік Адолфа Добряньского. І такым способом хотіли молоды умелці дати вклад до святкованя юбілею.

Скулптуру Добряньского вытворив Пряшівчан Марек Ганудель, котрый выштудовав Середню умелецьку школу на Водареньскій уліці в Пряшові і пак продовжовав штудовати на Факулті природных і гуманітных наук Пряшівской універзіты. Є реґуларным участником сімпозій і выставок дома і за граніцями.

На вернісажі, котра проходила в спомянутім парку перед Културным домом, брали участь і представителі Русинів. О културный проґрам за Русинів постарала ся фолклорна ґрупа Біловежанка, котра пришла бесплатно заспівати і подяковати ся орґанізаторам. Подякованя авторови скулптуры выразили і представителі Округлого стола Русинів Словеньска – Петро Медвідь і Мілан Ян Піліп, котры му на знак вдякы подаровали вєдно із памятным листом книжку Павла Роберта Хырбетом ку горам. Історія Карпатьской Руси і карпатьскых Русинів, яка лем кінцьом рока 2016 вышла в словацькім тлумачінню.

Орґанізаторы скулптуру вызначного Русина подаровали Округлому столу Русинів Словеньска. Тот бы мав на найблизшім засіданю рішыти, де буде Добряньскый уміщеный.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА