ІІ Медженародний Фестіваль «U Źródeł – При Джерелах»

Фундация Ars Activa просит на Медженародний Фестіваль «U Źródeł – При Джерелах», котрий зачал ся вчера, то єст 23. липця/юлия, і тырвал буде до наступной неділі, 30. липця/юлия, в Креници, Мушыні, Новици, Бересті та Бардийові. Выбір лемківскых місцевости не єст припадковий – вчас фестівалю буде мож чути і лемківскє рецитуване слово.

Фестіваль «При Джерелах» то неповторна артистична ініциятива, задачом котрой єст презентация концертів клясичной музыкы получена з рецитацийом поезиі. Вчас фестівалю буде представляна музыка інспірувана елементами природы, гір, курортів, музыка з обшыри сакрум та лемківска культура. Буде то музыка, котра творена была протягом століт, компонувана для высшых цілів, інспірацийом котрой была природа, віра, думка, слово.

Барз важном частю фестівалю єст рецитация лемківской поезиі, чытаня лемківскых леґенд в ориґінальній версиі та в тлумачыню на польскій язык. Заплянувано і цикль прелекций.

Більшіст подій (прелекциі і вісем концертів) проходила буде в Креници – центрі фестівалю, окрем того част пунктів проґраму одбуде ся в Бардийові (два концерты) і в Мушыні, Новици і Бересті (по єдным концерті).

Дрібниці найдете на плякаті пониже.