Русиньске Літо з Ракоційом

Місто Пряшів тот рік святкує 770-ту річніцю од першого писемного документу о місті. В рамках того цілый рік проходять різны културны події. Частьов тых святковань є і серія подій під назвов Літо з Ракоційом, котру приготовлює Крайскый музей в Пряшові і цільом є представити різны културы, котры жыють на теріторії міста Пряшів.

Найблизша неділя, 23 юлія 2017-го року, буде Літо з Ракоційом належати Русинам. Од 15.00 год. будуть годны навщівници Крайского музею спознавати русиньску културу і жывот Русинів на теріторії міста Пряшів. В співпраці зо Словацькым народным музейом – Музейом русиньской културы в Пряшові буде одпрезентована богата історія і народна култура посередництвом лекцій, выставкы, но і выступліня музикантів.

Як інформовала денник Korzár директора Крайского музею в Пряшові Марія Которова, лекції будуть мати Олґа Ґлосікова, директорка СНМ – Музею русиньской културы і Анна Кузмякова. В проґрамі будуть выступати Фолклорна ґрупа Стропковяне і Моніка Кушнірова з музичным супроводом. Частьов проґраму, за словами директоркы, буде і коментована переглядка етноґрафічной експозіції Крайского музею зо зверненьом увагы на русиньскы елементы в народній културы реґіону Шаріш.

Покровительство над подійов превзяв Петер Худік, председа Пряшівского самосправного краю і Андреа Турчанова, пріматорка міста Пряшів. Сердечно запрошаме.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА