ПУНА в Русинів Войводины. Червена Ружа 2017

Єдиний професийний русиньскій фольклорний ансамбль – Піддукляньскій Умелецкій Народний Ансамбль з Пряшова, в найблизшу неділю, 2. липця/юлия, выступит серед войводиньскых Русинів. Колектив даст для родаків ціловечерний концерт.

Концерт пряшівского ансамблю зачне ся в Театрі Младых в Новым Саді о 19.00 год. Выступліня є заплянуване в рамках тогорічной едициі фестівалю Червена Ружа – найстаршого фестівалю Русинів Войводины. Тот рік зачынат ся він уж в найблизшу пятницю, 30. червця/юнія. Окрем недільного концерту в Новым Саді, ПУНА выступит заєдно ден перше серед русиньской громады Руского Керестура (1.07). Тот святочний концерт зачне ся о 20.00 год. Перед ПУНА выступлят мішаний хор Культурного Дому в Рускым Керестурі та кафедральной церкви св. Миколая з Керестура, хор Гармонія з Нового Саду і танцювально-музычний ансамбль КУД Сербія з Кулы. В рамках подіі, яка буде тырвала цілы три дни, заінтересуваны будут мати нагоду видіти, окрем сценічных выступів, ріжного рода выставы, або брати участ в турнірах і забавах.

Піддукляньскій Умелецкій Народний Ансамбль посліднім часом запрезентувал премєру о русиньскых баниках під наголовком Крачали під нами. Найновше видовиско ансамблю мож было видіти м.ін. на посліднім Русиньскым Фестівали во Свиднику.