На Шляхтівскій Руси памятают про церкви полудньово-східньой Польщы в 70. річницю акциі «В»

На Шляхтівскій Руси, найдале на захід высуненым крайчыку Лемковины, в четвер 29. червця/юна т.р. о 16.00 год. одбуде ся вернісаж выставы знимок грекокатолицкых храмів полудньово-східной Польщы. То уж 5. едиция реченой выставы, яка тым разом присвячена є 70. річниці выгнаня.

Вернісаж, котрий пройде уж о тыжден, отворит выставу, на яку буде мож позерати од віторка до неділі через два місяці – до кінця серпня/авґуста т.р. Як інформуют орґанізаторы – Пєніньскій Музей в Шляхтовій (ул. Лемківска 37), выстава презентувала буде в більшости тоты самы материялы што перша, вказана в 2013 році в Варшаві, але інтересуюче є тото, же буде она збогачена о інформациі односячы ся до теперішньой ситуациі храмів, якы дальше остают без опікы.

З лемківского боку наголовок выставы може родити несмак – ходит о схоснуване слово «опущены». О кілько вчас переселінь Русинів на Радяньску Украіну деякы села ішли досправды добровільно і опущали своі храмы, о тілько в 1947 році выгнаня было примусове і нихто добровільно не опущал своіх сел.