«Хочеме дакус розправити ся з міфом, же Лемкы были бідны…»

Кінцьом червця/юнія коросняне зас будут мати нагоду ближе зазнаємити ся з лемківском культуром. А то за справом 5. едициі подіі, яку орґанізаторе назвали «Лемківскій Вечер» (о попередніх інформували сме гев або гев).

Найновший Лемківскій Вечер пройде під дакус особливым гослом: «Лемківскій Выпас» [«выпас» в польскым бесідуваным языку єст окрисліньом на штоси модне, доброго сорту, аж і чудове, кляве – прип. ред.] – запрашат орґанізатор Пжемек Поляньскій, член музычной ґрупы А Де То Давнійше Строіло. Хочеме дакус розправити ся з міфом, же Лемкы были бідны і не ходили ниґде поза своє село – продолжат.

Постійном частю вшыткых вечерів єст доповід про історию і культуру Лемків польского етноґрафа, реґіоналисты, забыткознавці – Тадеуша Лопаткєвіча. Тым разом тот выдатний знавця етноґрафіі Карпат оповіст медже інчыма о лемківскых мазярах і кривульках.

Обовязковым пунктом проґраму Лемківскых Вечерів єст тіж выступ фольковой ґрупы А Де То Давнійше Строіло. Як реклямуют орґанізаторе, на надходячій стрічы не бракне додатковых несподіванок, атракций і стріч з неповторныма особливостями Низкого Бескіду. Буде мож тіж посмакувати некотрых страв з лемківской кухні.

Подія зачне ся 30. червця/юнія о 19.00 год. в корчмі Паркова 7 в Коросні.