Музычны варштаты в Рускій Бурсі

Стоваришыня «Руска Бурса» в Ґорлицях сердечні просит на музычны варштаты, якы будут проходити уж в надходячу суботу, 10. червця/юнія, о 10.00 год.

Варштаты проведе Андрий Трохановскій – гушляр, композитор і аранжер. Од наймолодшых років бере активну участ в театрально-музычных передставлінях рыхтуваных Петром Трохановскым з нагоды ріжных подій повязаных з реліґійным та соспільным жытьом Лемків. Парунадцет років был членом ансамблю Лемковина веденого Маестром Ярославом Трохановскым. Єст членом молодіжного церковного хору православной єпархіі перемышльско-ґорлицкой Ірмос, кєрівничком котрого є Мариянна Яра, спілтворит ґрупу Клюб де Моль, гостинні выступує з Ластівочком, Кычером і вельома інчыма. Актуальні веде бурсяний ансамбль Терочка, а тіж занимат ся аранжуваньом народных русиньскых співанок і компонуваньом музыкы на хор і капелю до авторской лемківской творчости.

Варштаты будут мати забавово-едукацийний характер. Взяти участ в них може каждий охочий, не треба мати ниякой музычной практикы, неє тіж віковых ограничынь. На стрічы буде мож навчыти ся русиньскых співанок, попрібувати ся в грі на черчачых і черкочачых перкусийных інструментах – мило провести час. Вступне дармо!