«Слово» – Неділя Пятьдесятніці – неділя, 9.00 год.

Пережываме праздник Святой Пятьдесятніці або Сошествія Святого Духа. На десятый день по Вознесіню Ісуса на небо сходить Св. Дух, третя Божа особа, од Отця ісходяща на апостолів, котры перебывають на молитвах єдинодушно. Сходить в подобі огняных языків. Они не мали природу огня, але якбы із огня, мали вид огня. Розділюють ся над вшткыма, што ся там находили. І зачали бісідовати на різных языках. Сходить в подобі языків, жебы припомянути подію розділіня языків при будованю Вавілоньской вежі, кідь люди хотіли здобыти собі імя без Бога. Теперь сходить і розділены языкы зъєдинує довєдна віров в Хріста. Зо вшыткых робить народ Святой новозавітньой Церькви. І жебы своїма устами свідчіли о Хрістови, в подобі огня, жебы спальовав гріхы, страсти, і зогрівав тых, што увірять, надійов обіцяных благ. І на нас зыйшов Св. Дух при миропомазаню, но сходить закаждым, кідь го попросиме дотримавши условії правдивой віры в Хріста і щірого покаяня. Так і мы Го просьме, най і нас просвіщать, вказує нам світло Хрістового Євангелія, тоту дорогу, котров можеме безпечно в тій заплаві інформацій і наглядів того світа дойти до вічного блаженства в небі. Слава Ісусу Хрісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА