Варштаты млинарства в Ґладышові в рамках загальнопольского Дня Млинів

3. червця/юнія в Лемківскій Едукацийній Загороді в Ґладышові буде мож взяти участ в варштатах млинарства. Буде мож зазнаємити ся з будовом і фунґуваньом вітрового млина – такого, якій стоял колиси такой в каждым селі. Буде то тіж змога, як давно нашы діды, попрібувати ся з млиньскыма каменями і жорнами, жебы молоти муку. Участникы варштатів навчат ся тіж розріжняти ґатункы зерна і ріжны роды мукы.

Варштаты орґанізуваны сут з нагоды Дня Млинів 2017, при спертю Польского Молінолоґічного Товариства. Ден Млинів то подія, якой цілю єст приближаня сучасным, тепер уж часто забытковых місц і діянь, звязаных з вырабляньом мукы, неодлучного для каждой культуры елементу пожывліня. В Европі ден млинів мат уж вельолітню традицию, в Голандиі празднує ся го од 1973 рока в дн. 14.-15. мая і в тым часі одкрытых єст для туристів аж 950 млинів, в Німцях ачий більше, бо аж 1900 обєктів. Там же Ден Млинів празднує ся 16. мая, а тогорічна едиция буде орґанізувана уж 24. раз. Млины отвераны сут і в інчых державах: напр. во Франиці, Великій Британіі, ци Швайцариі. В Польщы буде то друга така едиция. Акция буде тырвала в днях од 2. до 5. червця/юнія. Вчас Дня Млинів 2017 одкрытых і доступных для звиджаючых буде вельо забытковых млинів в Польщы, м.ін. в лемківскым Ґладышові, зато же і Лемкы мают долгу традицию млинарской професиі.

Варштаты будут проходити в 11.00-15.00 год., занятя тырвают 60 минут; старт о каждій полній годині. Участ в занятах єст безплатна.