«Аж і слезы не старчыли» уж в інтернеті

Фільм «Аж і слезы не старчыли», премєра якого прошла вчас центральных лемківскых упамятнінь 70. річниці акциі «Вісла» (28.-30. квітня/апріля т.р.), є уж доступний в інтернеті. Заявила про тото вчера нашій редакциі спілпродуцентка того документального фільму – Мария Сільвестрі.

Продукцию в трьох языковых версиях (в лемківскій, польскій, анґлицкій) найдете в інтернетовым сервісі YouTube на офіцийным каналі фундациі John and Helen Timo Foundation, яка є і думкодавцьом проєкту, і його головным спонсором. Подібні як в примірі «Переміненых през Талергоф» Джона Ріґетті та Мариі Сільвестрі просит ся шырити фільм во всякых культуровых просторах, не лем русиньскым, але тіж (а може головно) серед другых народів.

Цінніст продукциі проявлят ся предовшыткым в тым, што як головны бесідникы выступуют в ній свідкы тамтых подій – люде, якы 70 років тому довєдна з родинами, сусідами, цілыма селами были насильно выгнаны на західні і пільнічны землі Польщы. Інтервю были так браны, жебы вказати істориі і тых Лемків, якы не змогли вернути з чужыны і доднес на ній прожывают, і тых, котрым повело ся вернути в горы. Вчас тереновых досліджынь проведеных так на чужыні, як і Лемковині продуценты зобрали бодай 30 годин награнь. То превеликій успіх і вартістний материял, котрого на жаль не дало ся повністю выкорыстати. Фільм тырват 1,5 год., што вказує нам, же реалізаторы мали тяжку задачу выбрати тото, што найціннійше. Самособом, не кажде з інтервю было во фільмі поміщене, але то не значыт, же материял не придаст ся при другых проєктах.

Як підкрисляют продуценты, фільм неє лем про Лемків/Русинів, але і про каждий нарід на земли. Світ повинен познати траґедию лемківской нациі, яка безосновні потерпіла. Апелюнок реалізаторів є на орґанізуваня проєкций фільму «Аж і слезы не старчыли», так як мало то місце в примірі продукциі про лаґєр в Талергофі.