Енді Варголь приде і до Ґорлиц

Кєд Енді Варголь был малым хлопцьом, часто хворіл, зато і сідил з мамом Юлийом в хыжы. Мешкали они товды в бідній, еміґрантскій части Пітсбурґа. Коли вшыткы выходили, отец до роботы, братя до школы, Енді з мамом ся бавили, рысували, малювали, аж і співали. Юлия Вархолова (з дому Завацка) николи не навчыла ся добрі бесідувати по анґлицкы, зато і співанкы, котрых навчыла найменчого з Вархолів, были русиньскы, привезены іщы зо старого краю. Дома очывидні тіж бесідувано лем по русиньскы. З той причыны мал потім Енді деякы проблемы з зарахуваньом некотрых предметів в школі. Енді был барз привязаний до мамы. Коли перенюс ся до Ню Йорка, пішла за ним і Юлия. Долго мешкали разом.

Пісні, якы Юлия співала корольовы поп-арту, почути буде мож на концерті пн. Пісні мойой мамы Юлиі, котрий пройде 3. червця/юнія т.р. о 18.00 год. в Ґалериі Штукы Двір Карвациянів в Ґорлицях. Ігор Куцер разом з ансамбльом Emotion Group выступит в рамках орґанізуваных Стоваришиньом Руска Бурса медженародных варштатів зо звукозапису і обробкы звуку. Вступне на концерт ДАРМО.

Пісні мойой мамы Юлиі то вынятковий проєкт, котрий взял ся з інспірациі ориґінальныма награнями мамы Енді Варголя, Юлиі Вархоловой. Сын Енді нагварил Юлию, жебы записала платню з народныма русиньскыма співанками, што співала му од дітины. Пісні награно в Пітсбурґу в 50. роках ХХ ст. Пані Вархолова высылала пак платні як подаркы своім близкым до старого краю.

В заміріню творців того проєкту было надати старым співанкам другого жытя – опрацувати іх наново і, в інтерпретациі оперового співака Ігоря Куцера в акомпаніяменті джазового ансамблю Emotion Group, запрезентувати шырокій публиці. В 2015 році народны пісні, співаны Юлийом малому Енді, в модерных аранжациях были записаны на платни CD, од того рока тіж Ігор Куцер з ґрупом концертуют з нима по цілій Словациі і ЗША. Перший раз Пісні мойой мамы Юлиі будут запрезентуваны в Польщы як раз 3. червця/юнія т.р. в Ґалериі Штукы Двір Карвациянів в Ґорлицях.

Ігор Куцер – оперовий співак, гушляр, абсольвент кошыцкой консерваториі та Высoкой Школы Музычного Знаня в Братиславі. Был членом Камеральной Оркєстры Молодых Солістів в Братиславі. Скінчыл Нацийональну Украіньску Музычну Академію ім. П. Чайковского. Выступує на дошках знаменитых театрів і опер держав середньо-східньой Европы, м.ін. Чешского Нацийонального Театру в Брні, Державной Оперы в Празі ци Державного Театру в Кошыцях. Спілпрацує з вельома оркєстрами: Кыівском Фільгармонічном Оркєстром, Московском Симфонічном Оркєстром Радия і Телевізиі, Кошыцком і Пільзненьском Фільгармонічныма Оркєстрами, Камеральном Оркєстром Virtuosi di Praga ци оркєстром Державной Оперы в Будапешті. Концертує по цілым світі. Выступувал м.ін. в Мексику, Японіі, Італиі, Іспаніі, Німцьох, Росиі, Анґлиі і тіж по цілій Словациі, Чехах і Украіні.