На Словакії схвалили фонд про меншыны

Словацькый парламент на своїм засіданю 10-го мая 2017-го року схвалив Закон о Фонді на підпору културы народностных меншын. 101 депутатів Народной рады Словацькой републікы голосовало за приятя закона, 13 депутатів голосовало проти і 22 ся стримало голосованя. Фонд выникне ку 1-му юлію 2017-го рока.

Як пише на своїм офіціалнім сайті коалічна партія Most-Híd, котра пришла з пропозіційов того закона, дякуючі зряджіню фонду компетенція придільованя дотацій про народностны меншыны перейде із Уряду влады Словацькой републікы на нову верейноправну інштітуцію, котра до културы принесе раз тілько грошей, як дотеперь. Цілковый розрахунок інштітуції на єден рік буде 8 міліонів евр.

Конрад Ріґо, державный секретарь Міністерства културы Словацькой републікы із партії Most-Híd підкреслив, же зряджідньом фонду буде забезпечена културна незалежность народностных меншын на Словакії.

„Є то вызначный крок, нелем про меншыны, але про цілу країну. Култура народностных меншын обогачує културу цілой Словакії. Приятя того закона то адекватно сімболізує,“ повів Ріґо.

Фонд має забезпечіти транспарентный і якостный фаховый поступ при роздільованю грошей і має підпорити всокочіня, выражіня, охорону і розвиток індентічности културных вартостей народностных меншын. Приголошены проєкты мають по новому оціньовати фаховы рады, в котрых складі мають мати своїх представителів фаховці із конкретных областей културы. Із 8 міліонів евр, котры каждый рік прийдуть про меншыны, будуть 4 процента схоснованы на ход інштітуції і решта буде розділена про меншыны. Першы вызвы фонду бы мали быти выголошены зачатком 2018-го рока.

Сістематічна підпора културы народностных меншын ся дістала до проґрамового выголошіня сучасной словацькой влады. Належало то міджі єдну і найважнішых пріоріт коалічной партії Most-Híd. Закон, котрый быв приятый, выходить із депутатьской пропозіції Ласла Шойомоша із 2015-го року, на приготовліню закона брали участь і Ласло Буковскый, уповномоченый про народностны меншыны і єтнічны ґрупы і Абел Равас, уповномоченый про ромскы комуніты.

Напрік тому, же Словакія прияла закон, котрым хоче сістематізовати фінанцованя културы народностных меншын, держава дотеперь не має приятый закон о народностных меншынах. Так як дотеперь і з нового фонду на свої проєкты буде мож черьпати 13 народностных меншын, котры суть на Словакії вызнаны. Русиньска народностна меншына є по мадярьскій і ромскій на Словакії офіціално третьов найвекшов, што так само має вплив на множество грошей, котры з фонду меншына може черьпати.

Жрідло фотоґрафії: dennikn.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА