ПУЛС рихтує премєру о русиньскых баниках

На 12-го мая 2017-го року Піддукляньскый умелецькый людовый субор оголошать нову премєру під назвов Крачали під нами. О хореоґрафію простарав ся Віліям Мікула, музику обробив Антон Коня.

Як пише ПУЛС у своїй куртій анотації, нове представліня є мозаіков образів зо світа русиньскых баників на долнім Спішу. Фаребность над земльов у гармонії з темнотов там долов суть феноменом прекрасного реґіону, в котрім доднесь жыє русиньске населіня.

„Назва є поетічна. Выражать тот факт, же тоты люди на долнім Спішу, кідьже занимаме ся в преставліню тематіков баництва в тім реґіоні, крачали під тыма, котры ходили там горі, по землі,“ повів про нашу редакцію хореоґраф Віліям Мікула.

„Матеріал є черьпаный чісто із русиньскых сел долного Спіша. Головно із сел Порач, Словінкы, Гелцманівці. Выбер співанок і танців быв конзултованый із етноґрафом Миколайом Мушинков. Матеріал походить будь прямо з терену, з бісідованя людей або зо збірників. Што дійовой лінії дотулять ся, не є то оповіданя, історія даякого конкретного єдного героя, його жывота, а суть то образы із баницкого світа. Представліня має образы робочой тематікы – роботы під земльов, но і образы того, што діяло ся горі, над баньов, значіть – што тых людей жывило, як ся забавляли, як пережывали свій час. Є там веце іншпірацій,“ інформовав Мікула.

Хоць приготовліня того представліня было за словами хореоґрафа тяжке, тырвало коло пів рока, співпрацу з нашым професіоналным ансамбльом собі барз похвалює.

„З ПУЛС-ом ся мі робить абсолутно найліпше. По перше, то професіоналный ансабель і так ся не мушу нияк обмеджовати у своїй творчости. Другов справов є, што є барз силна сторінка того ансамблю, же ту функціонують три компоненты  – ПУЛС має орхестер, балет і хор. В тім виджу найвекшу силу. Вшыткы тоты три части ансамблю довєдна давають много, а хор давать основу того цілого, што є в русиньскім етніку. Бо через хор чути русиньскый язык в текстах.“

Прємера нового представліня Піддукляньского умелелецького людового субору буде 12-го мая 2017-го року о 18.30 год. на Великій сцені Театру Йонаша Заборьского в Пряшові. Другу премєру буде мож видіти о два дні пізніше, 14-го мая о 16.00 год. Тікеты в ціні 10 € може куповати уж теперь в касі Театру Йонаша Заборьского, в історічній будові на Главній уліці ч. 48.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА