Подорож до Старого Краю

В найблизшу суботу, 25. марця 2017 р., Карпаторусиньскє Общество в Зъєднаных Штатах Америкы, котре на американьскым континенті чыслит парунадцет орґанізацийных єдиниц, просит на дві подіі, в рамках котрых тамтышні Русины будут мати нагоду перенести ся в сентиментальну подорож на Карпатску Русь.

Першу з подій буде орґанізувал одділ в Ню Джерзі, де прусутны почуют оповіданя прелеґента, котрий ярю 2016 рока одвиділ Підкарпатску Русь. Джордж Напуда, котрий є членом одділіня в східній Пенсильваніі, поділит ся одчутями про подорож в стороны своіх предків, котру одбыл в околицях підкарпатскых міст Ужгород та Мукачево. Напуда перебывал в Клаченеві, Іванівцях, Жукові, Лочеві, а тіж в самым Мукачеві. Вчас прогулькы на Підкарпатя, мал нагоду одвидіти православний Свято-Успеньскій женьскій монастыр в селі Домбокы (Мукачівскій район). Подія пройде в містецкій бібліотеці (Wayne Public Library, 461 Valley Road, Wayne, NJ 07470).

Другом подійом, яка пройде в найблизшу суботу, є стріча орґанізувана одділіньом Карпаторусиньского Общества в Пілнічній Каролині. Буде то подія посвячена темі зимы в Карпатах. Присутны дознают ся, в якій спосіб Русины прожывали тяжкы гірскы зимы. На стрічы звернена буде увага на карпатскє зимове облечыня, стравы рыхтуваны в тым часі, як тіж вшелеякы занятя в тот період, коли ден є о вельо коротший од долгых вечерів. Другом темом стрічы, буде проба одкрытя деякых поганьскых звыків, якы гейбы втримали ся серед Русинів, а были популярны помедже Різдвом і Великодньом. На тоту подію треба ся скорше записати під адресом: carpatho.rus.avl@gmail.com.