В Москві вкажут улюблене авто Енді Варголя

В московскым сальоні продажы авт маркы Мерцедес-Бенц буде вказана выстава пн. Улюблене авто Енді Варголя. Вернісаж одбуде ся 31. марця, а саму выставу видіти буде мож до кінця квітня/апріля.

На выставі запрезентуваных буде 50 ориґінальных образів артисты, серед них – його улюблений модель Mercedes-Benz 300 SL. Полотна поділены будут на пару тем: авта часу Варголя, забытковы моделі і футуристичны авта. А додатковым позаавтомобільным дополніньом выставы буде образ суперзвізды попкультуры 50. і 60. років – значыт образ Мерилин Монро.

Подля орґанізаторів, вказаний на ґрафіці Mercedes-Benz 300 SL, то символ повоєнного достатку і любови Американів до такого выображыня люксусу і заможного стилю жытя.

Колекцию творів пн. Авта Енді Варголь зробил на замовліня Мерцедес-Бенц в 1986 році. Німецкій маршанд, Ганс Мейер, замовил найперше образ моделю 300 SL з нагоды столітя істнуваня Мерцедеса. Коли в Мерцедесі взріли ефект – попросили о цілу серию, жебы вказати еволюцию взорів автомобілів од Benz Patent-Motorwagen з 1885, через Daimler Motor Carriage (1886), Mercedes 35 hp (1901), по Mercedes-Benz W125 і модель Mercedes-Benz C111.

Колекция не была скінчена в звязку зо смертю Варголя в 1987 році. До того часу артиста скінчыл 36 серіґрафій і 13 рисунків осмох моделів. Варголь плянувал, жебы серия чыслила 80 творів, на котрых хотіл вказати 20 моделів. При творіню операл ся о знимкы авт. Были то першы обєкты запроєктуваны не через Американина, якы спортретувал Варголь.

Авта выставляны были дотепер лем двараз: в Тюбінґен в Німцях в 1988 році та в Відни в 2010 році. Половина колекциі вказана была в Мільтон-Кінз в Великій Британіі в 2001 році.

Колекция Авта была його другым автомобільным проєктом. В 1979 році БМВ Варголя попросило намалювати авта іх фірмы. Інакше як трьох предшых артистів, котры намалювали модель BMW M1, Варголь не хотіл зобразувати го в поменьшеній скали, лем в ориґінальным розмірі. Як ся потім рознесла вістка, Варголь цілістю скінчыл образ в 23 минуты.

Фот. пресовы материялы Мерцедес-Бенц.