Мурянка в товаристві чудовых жен

Тры особливы музычны явиска, тры чудовы голосы, тры прекрасны жены – Сусанна Яра (Susanna), Ганка Вуйцяк (Hanka) і Аґата Сємашко (Agata), значыт S.H.A. Кажда з окрема будучы на сцені притігат цілу увагу публикы і не мож перестати єй слухати. Тепер лучат силы.

Тяжко уявити сой, што то буде за пережытя, коли тоты тры характерны голосы злучат ся в єдно, коли єден голос буде дополніньом другого, третій першого, а єден з другым будут ся переплітувати, накладати, мішати… Лем же, то не конец. Акомпанювал буде дівчатам выдатний віртуоз гры на цимбалах – Мирослав Райт. Концерт Women Ethno Power одбуде ся уж в найблизшу середу, 8. марця, о 19.00 год. в просторах Жыдівского Музею Ґалиция в Кракові.

Кажда з солисток на сцені пристуна єст уж од долгого часу, мат выроблений неповторний стиль, але не спосіб даной артисткы зашуфлядкувати. Експериментуют, анґажуют ся в ріжны проєкты, все додаючы або надаючы ім свій рит. Аґата Сємашко залюблена єст в ромскій і словацкій музыці, єй ліричніст не мат собі рівных. Ганка Вуйцяк в своій творчости субтельні шмуґлює ґуральску музыку, а єй тексты выкликуют вершыну рефлексий. Сусанна Яра справлят, же нихто більше не повинен співати Мурянковых творів, робит з них перлины, якы порушают каждого слухача, а співанкы. хоц одкликуют ся до лемківской долі, стают ся універсальны.

Здає ся, же і вчас найблизшого концерту не бракне композиций Петра Мурянкы. Вызвучат пісні любови, здрады, заздрости, долі, смутку, землі, свободы, стрічы, радости, смерти. Пісні щестя.

Артисты заповідают, же концертів Women Ethno Power буде більше. Ціле щестя.