«Слово» на першу Неділю Великого Посту – неділя, 9.00 год.

Євангеліє днешньой неділі говорить о покликаню Філіпа і Натанаїла. Філіпа Ісус кличе: Подь за мнов. А Натанаїл є позваный ку Хрістови через Філіпа. Говрить му, же нашли того, о котрім пророкы і Мойсей писали. Ісуса із Назарета. Кідь Філіп ся звідать, ці може быти із Назарета дашто добре, Філіп му одповідать: Подь і увидиш. Ісус видячі Натанаїла говорть му: Правдивый Ізраілитян, в котрім не є фалошности. На зачудованя Натанаїла, Ісус одповідать, же го видів іщі скоріше, як го Філіп позвав. Тогды зволав: Ты, Сын Божый, Ты Царь Ізраіля. Што нам днешнє слово хоче повісти в тім постнім часі? Указує нам, же Ісус є правый Бог і правдивый чоловік. Перед ним нич не є скрытого, утаєного, ани то што ся находить в нашых сердцях. В тім постнім часі нам собі тото треба усвідомляти. Він видить хто і в якім росположіню приходить ку Ньому. Хто і як ся постить, ці робить добры діла, ці приходить ціловати іконы. Робме вшытко щіро, не фалшиво, з любви ку Богу не про людьске око. Жебы і о нас платили тоты слова высловлени о Натанаїлови: Тото є правдивый хрістіан, тото є правдивый постник, тото є мій правдивый слуга, мій правдивый раб. Слава Ісусу Хрісту!

В неділю, 5-го марця 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 5-го марця о 12.00, 15.00, 20.00 год. і 6-го марця о 2.00 год. за русиньскым часом.