Никыфора будут выставлювати на Шлеску

Образы єдного з найвыдатнійшых малярів примітивістів, знаного на цілий світ Русина родом з Крениці – Епифана Дровняка, званого Никыфором Креницкым, неодолга буде мож видіти на выставі на Шлеску. Містецкій Музей в Забжу заявил о вернісажы выставы його творів, якій одбуде ся 15. марця т.р.

Як дальше інфромує музей, має він в своій колекциі 23 Дровянковы малюнкы, котры головно представляют краєвид з околиц Крениці. Мож на них видіти лемківскы церкви, котрыма часто в своій працах занимал ся Никыфор. Він як жытель Крениці часто представял місцевіст точно з пізріня на курорт і великє чысло пенсийонів, котры притігали гостів з цільой Польщы, ай заграниці. Але музей може гордити ся і такыма малюнками, котры фраґментарично представляют містецку забудову Кракова, як тіж два образкы з видом святых Йосифа і Миколая.

Речена колекция то лем невелика част того, што за вшыткы рокы жытя сотворил тот выдатний артиста. Припущат ся (хоц оне не єст просте зрахувати, понеже вельо Никыфоровых творів пропало на все), же автор намалювал парудесят тисячів акварель (a при тым вельо недокінченых шкіців), котры часто оддавал дармо курортникам, якы на тамтот час не доціняли лемківского ґенія, а образкы метали гет.

На выставу буде мож позерати до 29. квітня/апріля т.р.