Фестіваль Новой Русиньской Народной Співанкы «Ружова Заградка»

В найблизшу неділю (5.03) в Новым Саді на Бачваньскій Руси буде проходил 27. Фестіваль Новой Русиньской Народной Співанкы «Ружова Заградка». То фестіваль, завдякы котрому шырша публика може познати русиньскы співанкы і пошырювати народний репертуар.

Того рока запрезентуваных буде 14 новых композиций утриманых в народным духу. Співати будут іх солисты і єдна ґрупа, при акомпаніяменті Великой Народной Оркєстры Радийо-Телевізиі Войводины. Сумуючы з тогорічныма співанками, фестіваль дотепер выпродукувал 355 новых русиньскых співанок, пошыряючы тым самым наш фольклор. Завдякы участи Радийо-Телевізиі Войводины при орґанізациі фестівалю нова русиньска творчіст єст шыроко промувана і продукувана на професийональным рівни. Єст то єдина інституция, котра старат ся о вытворюваня новой народной музычной творчости Русинів, котра пак може быти почута людми, входячы в культуру народа.

В рамках фестівалю буде проходил тіж вернісаж выставы робіт Андєлкы Античевич, а ревіяльна част проґраму посвячена буде поетицкій творчости Дюры Латяка, до котрого текстів скомпонуваных было вельо співанок презентуваных пак на фестівалях «Заградка» ци «Червена Ружа».

Головным орґанізатором фестівалю єст Радийо-Телевізия Войводины при спілпрацы русиньской редакциі Третього Проґраму РТВ сектора музычной продукциі РТВ Войводины.