ПУНА (PUL’S) даст шов в Пряшові

Єдиний професийональний русиньскій ансамбль – Піддукляньскій Умелецкій Народний Ансамбль (PUL’S), 25. марця т.р. просит на великій, репрезентацийний концерт в Пряшові. Істо то буде шов, бо і так заявил про сесу подію ансамбль.

Концерт, якій пройде на Великій Сцені в Театрі Йонаша Заборского в Пряшові, зачне од 18.30 год., а досправды буде то міцна давка двогодинной русиньской народной культуры. Режысером проґраму є Ярослав Моравчык, а за дириґентуру одповідат Юлиюс Сельчан. В рамках репрезентацийного концерту на сцені Театру Заборского з ПУНА выступлят специяльны гості. То Маріо КУЛИ Колляр та Співацкє ДУО ЛА ФЕММЕ.  Вступне мож придбати в ТЙЗ в Пряшові.

Єдна з основных ціли ансамблю – промувати русиньску культуру во світі. ПУНА, як професийональний ансамбль, тым же способом є амбасадором русиньской культуры. Промоция співу, танців і культуры постійно одбыват ся і дома, де ПУНА што деякій час орґанізує святочны, ай просто репрезентацийны концерты як тот. Ансамбль на того рода концертах радо представлят русиньскы видовиска, котры сут по правді получыньом музыкы, танця, співу і театральной гры. В 2015 році ПУНА орґанізувал цілорічны празднуваня 60 років од покликаня. Што кус ансамбль голосит рекрутациі, через котры мож приступити до того єдиного во світі професийонального русиньского ансамблю.

Піддукляньскій Умелецкій Народний Ансамбль выникнул в 1955 році в Пряшові, на тамтот час як украіньскій ансамбль. В колективі, котрий творят три части – танцувальна, співоча і музычна – робит більше як 40 артистів. За ціле істнуваня выховал понад 500 професийональных співаків, музыків, танцуристів, котры днес являют ся інструкторами, солистами, або членами інчых фольклорных ансамблів, так в Словациі, як і заграницьом.

Днешній ПУНА фунґує як професийональна русиньска інституция культуры, котра вказує найвысший рівен артистичной діяльности, будучы взором для вельох подібных непрофесийональных русиньскых колективів того рода во світі, якы з захопліньом смотрят на кажду обшыр діяльности ПУНА – він бо окрислят абсолютну вершыну професийональности в тым просторі.

Долов Вербунк – рекрутскій танец, в выконаню ПУНА.