Сут іщы місця в змаганях Лемковина Ультра Трейль

Фурт мож іщы зголосити свою участ в змаганях Лемковина Ультра Трейль 2017. То спортовы змаганя, вчас котрых мож прелетіти вздолж цілу Лемковину (для тых, хто рішыл выстартувати на трасі ЛУТ 150). Окрем той до выбору сут іщы 4 трасы, а по правді выбрати мож лем спосеред 3, бо на трасах ЛУТ 80 і ЛУТ 70 неє уж свобідных місц. На найдолшій, долгости 150 км, сут іщы 72 свобідны місця, на трасі Лемко Маратон (цілий дистанс то 48 км) можут іщы записати ся 304 особы, а на Лемко Трейль (пут долгости 30 км) – єст іщы 315 місц.

Вшыткы трасы ведут долинами і верхами Головного Бескідского Пути. В сумі, в тогорічных змаганях буде могло взяти участ навет 2.150 осіб (по 500 літачів на трасах долгости 30, 48, 70 і 150 км та 150 осіб на трасі долгости 80 км). Через два дни од початковой фазы записів зголосило ся 1.300 осіб.

О успіхах в орґанізациі і популярности змагань Лемковина Ультра Трейль доводит факт, же минулого рока змаганя выграли аж в 3 катеґориях в плебісциті на Найліпшы Польскы Гірскы Змаганя Злота Козіца. Лемковина Ультра Трейль голосами участників ріжных змагань, орґанізуваных в 2016 році в Польщы, достала перше місце в катеґориях: Open, змаганя на ультрадистансі і в катеґориі Фестіваль Літаня.

Тогорічны змаганя будут проходити в днях 13.-15 жолтня/октобра.