«Церкви і іконы Лемковины» в Перемышли

В неділю, 19. лютого/фебруара т.р., буде проходила чергова авторска стріча, звязана з промоцийом книжкы Церкви і іконы Лемковины авторства Ярослава Ґємзы. Премєра книжкы проходила в грудни минулого рока, а першы промоцийны стрічы одбыли ся в Ґорлицях, Ряшові i Кракові. Шырше о книжці і авторі писали сме гев.

Наступным місцьом презентациі книжкы буде конференцийна саля Митрополитального Уряду Перемышльско-Варшавской Грекокатолицкой Архієпархіі о 10.45 год.

Книжка Цекрви і іконы Лемковины єст монументальным ділом, в котрым комплетні передставлена єст церковна артистична культура з обшыри Лемковины, вміщена в контекст руско-візантийской штукы. Книжку отверают 4 вступы. Три першы были написаны через: римокатолицкого, грекокатолицкого та православного духовных, четвертий єст всупом од автора – Ярослава Ґемзы. Перший розділ тыкат ся візантийской традициі в церковній штуці і архітектурі. Другій єст продолжыньом безцінного допису Єжы Тура сперед 30. років (Є. Тур то выдатниг специялиста в обшыри деревяной архітектуры – чловек, кторий ціле своє жытя посвятил на ратуваня материяльного дідицтва полудньово-східной Польщы, вмер в 2009 р.). Третій розділ односит ся до внутрішнього выпосажыня церкви, іконостасів, ікон, олтарів, авторів стінных розписів, а в четвертым поміщено вельо придатных інформаций, напр. як чытати даты ци скорочыня на іконах в старо-церковно-славяньскым языку і інчы інскрипциі.

Автор книжкы, Ярослав Ґємза, єст выдатным знавцьом церковной штукы, од 25 років єст кєрівником Одділіня Церковной Штукы при Музею Замку в Ланцуті та автором десяток дописів про церковну штуку, ци редактором вельох науковых робіт, тыкаючых церковной штукы.

Послухайте, як по лемківскы Ярослав Ґємза просит до чытаня його книжкы: