На дні одкрытых дверей і русиньскый інштітут

І тот рік Пряшівска універзіта в Пряшові приготовила подію під назвов День одкрытых дверей, котрый одбуде ся дня 15-го фебруара 2017-го року од 7.30 год. до 13.00 год. в просторах Высокошкольского ареалу в Пряшові.

Презентовати ся на події буде вшыткых вісем факулт універзіты а своє шатро буде мати і Інштітут русиньского языка і културы. Участны ся на події можуть дізнати інформації о штудійных проґрамах, условіях про приятя на штудіюм, чекають на них різны презентації і лекції. Обогачіньом проґраму буде і выступліня умелецькых тілес Пряшівской універзіты в Пряшові.

Єдиный на Словакії

Інштітуція заміряна на русиністіку діє на Пряшівскій універзіті в різных формах свого існованя од 1-го септембра 1998-го року. Як Інштітут русиньского языка і културы Пряшівской універзіты пише свою історію од 1-го марца 2008-го року. Моментално належыть під Центер языків і култур народностных меншын Пряшівской універзіты. Того часу є можливе на інштітуті штудовати бакаларьскый, маґістерьскый і докторандьскый штудійны проґрамы. Русиньскый інштітут в Пряшові є єдинов інштітуційов на Словакії, де мож штудовати русиньскый язык і културу.

Можливости штудія

В академічнім році 2017/2018 є можливе штудовати бакаларьскый і маґістерьскый штудійны проґрамы: Учітельство академічных предметів.

Проґрам учітельство русиньского языка і літературы в комбінації ся реалізує як міджіфакултне штудіюм із акредітованыма штудійныма проґрамами Філозофічной факултры Пряшівской універзіты, Факулты гуманітных і природных наук і Факултов шпорту.

На факулті гуманітных і природных наук собі штуденты в академічнім році 2017/2018 можуть выбрати до комбінації біолоґію, еколоґію, фізіку, ґеоґрафію, математіку, педаґоґіку і техніку. Філозофічна факулта дає можливость комбіновати учітельство русиньского языка і літературы із анґліцькым языком і літературов, історійов, естетіков, етічнов выховов, філозофійов, музичным уменьом, німецькым языком і літературов, російскым языком і літературов, словацькым языком і літературов, україньскым языком і літературов або выховов ку гражданьству.

Факулта шпорту понукать комбінацію із тілеснов выховов а на Інштітуті мадярьского языка і културы є можливе русиньскый язык і літературу комбіновати із мадярьскым языком і літературов.

Тоты, што бы мали інтерес штудовати на русиньскім інштітуті, потребують загнати офіціалный формуларь до 31-го марца 2017-го року на адресу: Prešovská univerzita v Prešove, Centrum jazykov a kultúr národnostných menšín, Ústav rusínskeho jazyka a kultúry PU
Ul. 17. novembra 15, 080 01 Prešov.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА