„Проґрес Іванововой хвороты“

Театр Руской Бурсы запрашат вшыткых на слуховиско авторства Аркадія Аверченка пн. „Проґрес Іванововой хвороты“. Тот проґресивний програм зачынаме в понедільок по 08.00 вечер. 

Чітате новинкы, ґазеты? Робите то каждый день, або лем з часу на час? Не чуєте коло того жаден тиск? На тілі, або в голові? Не тискать вас то доліва? Ці може доправа?

Іванов єдно рано встав і было му байка. Цілый час чув, же є непартайник, але під рукы му пришли новинкы. Дочітав ся, же в Ченстоховій ґубернатор заказав лекцію о здобываню дусіка з воздуху. І втім почув, же ся воздуху ани йому не діставать. Сердце му стягло, на момент і перестало бити, закрутила ся му голова. Зачав переходити наліво!

І тот тыждень продовжуєме в презентації світовой літературы. Аркадій Аверченко (1881 – 1925) быв єдным із найпопуларнішых руськых гуморістів зачатку 20. столітя. Його творчость є повязана з демократізачныма тенденціями, котры переходили на зачатку минулого столітя в Росії. Дослідком тых тенденцій быв і великый розвиток гуморістічной і сатірічной літературы. Аверченко быв талантливый і універзалный журналіста в популарных часописах Сатірікон і Новый Сатірікон. По Октобровой револуції перешов в 1917 році до небольшевіцькой части южной Росії, пізніше еміґровав і жыв в Празі. Його твор „Проґрес Іванововой хвороты“ можете выслухати на радію лем.фм.

А не забудьте: Не чітайте новинкы! Могло бы вас то зачати тискати аж до заснованя політічной партії. Чітайте з нами на лем.фм Аркадія Аверченка.