Задбаний забыток – ци дакотра з церкви буде доцінена?

До 31. січня/януара т.р. мож зголошати забыткы до конкурсу Міністра Культуры і Народовой Дідовизны пн. Задбаний Забыток. Мают то быти забыткы, якы того рока были выремонтуваны, або сут по консерваторскых ци реставрацийных роботах.

Цілю конкурсу єст промоция правильной опікы над забыткамы, в тым популяризуваня найліпшых взірців консервациі, утриманя і хоснуваня забытку. До конкурсу зголошаны можут быти обєкты, котры вписаны сут в державний реґістер забытків. Пропозициі высувати мож в парox катеґориях:

• захованя забытковой вартости обєкту,
• ревальоризация культурового простору і краєвиду,
• адаптация забытковых обєктів,
• деревяна архітектура і будівництво,
• індустрияльна архітектура і інжынєрийне будівництво
• специяльна катеґория: правильне хоснуваня і постійня опіка над забытком.

Зголошыня опініюваны будут працівниками тереновых одділінь Народового Інституту Дідовизны, котры на основі консерваторского проєкту, його верифікациі з проведеныма роботами, а тіж через комплексове запознаня ся з консерваторском документацийом проведеных прац, выдадут опінію, приділюючы пункы. Опініі высыланы сут до Капітулы Конкурсу, котра на основі переданой внескуючым документациі, підпераючы ся опінійом НІД, выдає конечне рішыня о признаню нагороды.

Мало правдоподібным єст, жебы дакотра з лемківскых церкви остала того рока выріжнена предовшыткым зато, же в 2016 році не скінчыл ся ремонт ниякой з однавляных цекрви. Фурт ведены сут роботы напр. при церкви Архангела Михала в Святковій Великій, або при церкви свв. Петра і Павла в Креници. Перед трьома роками єдным з лавреатів конкурсу Задбаний Забыток остала православна церков Покровы Пресвятой Богородиці в Ганчовій, которй настоятельом єст о. В. Канюк.