Лемкы (в)ходят до Оперы

«Пісні і співанкы» Петра Мурянкы выконаны з неповторном, особливом та непересічном вражливістю, через украіньску вокалистку Сусанну Яру, вызвучат на краківскым фестівали Опера Рара.

Од тыжня в Кракові проходят оперовы жнива, якы будут ся продолжати до 10. лютого/фебруара. Вшытко за справом Опера Рара, якій од того рока єст уж не лем цикльом бароковых опер в концертовых выконанях, але фестівальом о більшій репертуаровій ріжнорідности. Опера Рара, значыт опера рідка, раритас, того рока выходит поза барок. Репертуар фестівалю то образ мало не штырьох століть, обнимат 14 концертів, в тым три вокальны концерты солистів, а серед них – выступ Сусанны Ярой.

Фестіваль заінавґурувала 18. січня/януара сміла продукция французкого ансамблю Le Poème Harmonique під дирекцийом Венсана Дюместра і молодой, залюбленой в стили скорого бароку, режысеркы Сесіль Руса. За три дни, 20.-22. січня/януара, презентуваний был спектакль Кжыштофа Ґарбачевского «A Madrigal Opera», композициі сучасного американьского артисты Філіпа Ґласса. К. Ґарбачевскі збудувал абстракцийну наррацию з подій, руху, образів, акторскых етюд – вшытко без слів. Спекталь проходил не в театрі, а в монастырскій сали св. Якова. А о два дни, 26. січня/януара, одбуде ся перший з трьох заплянуваных вокальных концертів. Перед публиком запрезентує ся Міхаеля Селінґер – австрийска мецосопран. Заспіват творы Кляры і Роберта Шуманів, Йоганеса Брамса, Альбана Берґа і Клода Дебюсі. На другым вокальным концерті (29.01) выступит з композициями Франца Шуберта до поезиі Вільгельма Мілера анґлицкій баритон Пітер Гарві. Тот концерт попереджений буде выставліньом в Театрі ім. Ю. Словацкого оперы «Germanico in Germania» композициі Ніколы Порпоры. Выступлят: росийска спораністка Юлия Лежнева та найвыдатнійший сучасний контратенор Макс Емануель Ленчіч. Товаришыла буде ім Capella Cracoviensis. Показ сценічных оперовых продукций продолжаний (31.01, 01.02 та 02.02) буде выконаньом славной «Галькы» Станіслава Монюшка, тым разом в необычній версиі – ориґінальній, двоактовій віленьскій версиі з 1848 рока.

Привидні знаны пісні Кароля Шымановского вызвучат 4. лютого/фебруара. На запрошыня артистичного директора Capellі Cracoviensis Яна Томаша Адамуса, на ново зінтерпретує іх Сусанна Яра. Концерт Бор ся о пісню вызвучыт в так неповторным місци (кафе БАЛЬ), якым являт ся і проґрам выступу, зложений з творів польского композитора і лемківскых пісен Петра Мурянкы. Попри Шковраночку і Посій же, ся посій вызвучыт тіж народна співанка з центральной Украіны – Летіла зозуля. Акомпаніятором першых двох части концерту («Пісні княгыні з баі оп. 31» та «3 курпьовскы пісні на голос і піано оп. 58») буде Марек Шлезер, талановитий піяніста, лавреат чысленных медженародовых конкурсів і фестівалів, учытель-мастер на Музычній Академіі в Кракові. До пісен Ніско слонко (курпьовска пісня) та Шковраночок і Посій же, ся посій Сусанні товаришыл буде Павел Гараньчык, з котрым артистка спілпрацує од долшого часу.

В наступных фестівальовых днях почути буде мож концертову версию оперы Ґеорґа Фрідріха Генделя «Arminio» в выконаню аснамблю Armonia Atenea під батутом грецкого дириґента Йорґоса Петру, пак познаньска оркєстра Arte dei Suonatori вкаже серенаду «Marc’Antonio e Cleopatra» Йогана Адольфа Гассе, вокальны части выконают Шведкы – сопранистка Марія Кеогане і альтова співачка Марія Саннер.

Закінчыньом фестівалю Опера Рара буде презентация єдного з найважнійшых анґлицкых оперовых творів «Dido and Aeneas» композициі Генрі Перселя. О правильну інтерпретацию істориі траґічной любови Дідоны і Енея постарают ся выдатны солисты, м.ін. сопраністка Рафаеля Мілянезі та баритон Ріхард Гельм. За інструментальну част одповідал буде ансамбль La Risonanza, ведений Фабійом Боніццоні, а товаришыл буде ім на половину аматорскій Krakowski Chór Mieszczański.

Орґанізаторами фестівалю Опера Рара сут: Місто Краків, Краківскє Фестівальове Бюро та Capella Cracoviensis.