Теолоґія Красы: о чытаню ікон

В Кракові будут дознавати ся про язык іконы. Орґанізуваны будут варштаты чытаня ікон, якы пройдут в сальках Марияцкой Базилікы. Перша з прелекций одбуде ся 5. лютого/фебруара коло 19.30 год.

Цілю заплянуваных стріч єст приближыня вірным Західнього Костела, а і вшыткым заінтересуваным, значыня схованого в іконах. Сучасні ікона та іконописарство стали ся барз популярны – навет і модны. Не все іде за тым контемпляция, долше затриманя ся перед святым образом і істо зрозумліня іконы. Жебы так ся стало, необхідне єст познато язык іконы. Через тото, ікона не буде постерігана як лем артистичне діло, а досправды може зродити реальну стрічу з Богом.

Варштаты вести будут Надія Мяжевич та др о. Ян Струміловскі. Н. Мяжевич занимат ся писаньом ікон, походит з Білоруси. Єст абсольвентком малярства в Міньску, інтересує ся візантийском штуком. Єст авторком і спілредакторком блоґа, посвяченого штуці писаня ікон і теолоґіі іконы: blogokno.com. Спілредактором того же медиюм єст о. Струміловскі – цистерцияньскій монах, доґматик, выкладовця Высшой Духовной Семінариі в Катовицях-Паневніках. Єст настоятельом новіцияту (одповідник послушництва в східніх Церквах) Цистерциянців в Єнджейові. Занимат ся теолоґійом красы, тринітарном теолоґійом, христолоґійом та теолоґійом познаня, особливо в еґзистенцияльным і естетичным аспектах, а тіж єй реляциями з сучасном філософійом і емпіричныма науками. Єст автором чысленных публикаций, м.ін. книжок Piękno zbawi świat або Zrodzony z wiary.