Актывний “долгій вікенд”

Тогорічний майовий “долгій вікенд” не для вшыткых был лем нагодом до зачатя кобаскового сезону, ци продолжаня колейкы на Ґєвонт. Актывні провели го м.ін. особы заанґажуваны в ремонт прицерковной дзвінниці в Полянах Суровичных. Повело ся вкрытя одремонтуваных мурів дзвінниці провізорычным (але солідным) дахом, якій забезпечыт вінец мурів пред шкідливым влияньом сонця, вітру, воды, снігу ци дойджу. Елементы конструкциі даху схоснуваны будут до будовы увінчаючой дзвінницю бані, котрой будова заплянувана єст на будучий рік.

Ремонт дзвінниці в Полянах проваджений є уж од трьох років з інициятивы СКПБ Варшава, КТЕ Стыкі і Стоваришыня Маґурич. На сайті polanysurowiczne.waw.pl найдете більше інформаций про проєкт ремонту дзвінниці і актуальний етап робіт.
Фотореляция з будовы даху за мотузком: Будова даху

В Полянах працувано на дзвінници, а в Реґєтові і Шквіртным на цмонтерях. Стоваришыня Маґурич зачало тогорічний ремонтовий сезон од робіт на Лемковині. Повело ся докінчыти ремонты вшыткых памятників на реґєтівскым цмонтери, але зо причыны малого чысла вольонтерів, не годны провести вшыткы заплянуваны роботы на цмонтери в Шквіртным.
Фотореляция з робочого табору за мотузком: 70. ремонтовий обіз Стоваришыня Маґурич,
а додатково до почытаня особиста реляция єдного з участників: Робота на цемонтери…
– рекомендуєме!

Наступний, 71. ремонтовий табір, одбуде ся в дн. од 29 червця до 13 липця в Вєжбіцы (ґміна Королівска Любича).