«Церкви і іконы Лемковины» в Кракові

В неділю, 22. січня/януара т.р., буде проходила чергова авторска стріча, звязана з промоцийом книжкы Церкви і іконы Лемковины авторства Ярослава Ґємзы.

Премєра книжкы осбыла ся в грудни/децембрі минулого рока, а першы дві промоцийны стрічы проходили в Ґорлицях і Ряшові. Перша тогорічна презентация книжкы зачне ся од 11.30 год. в Кракові в пивницях грекокатолицкой церкви Воздвыжыня Креста Господнього. Перед стрічом мож взяти участ в Службі Божій полученій з концертом церковного хору (поч. о 10.00 год.).

Книжка Цекрви і іконы Лемковины єст працом, в котрій комплексово передставлена єст церковна штука з обшыри Лемковины, вміщена в контекст руско-візантийской сакральной артистичной культуры. Публикацию отверают 4 вступы. Три першы были написаны через римокатолицкого, грекокатолицкого та православного духовных, четвертий єст вступом од автора – Ярослава Ґемзы. Перший розділ тыкат візантийской традициі в церковній штуці і архітектурі. Другій єст продолжыньом безцінного допису сперед 30. років, авторства Єжы Тура (вм. в 2009 р.), выдатного специялисты в обшыри деревяной архітектуры і чловека, котрий в рамках свойой професиі занимал ся ратуваньом материяльного дідицтва полудньово-східной Польщы. Третій розділ односит ся до внутрішнього выпосажыня церкви, іконостасів, ікон, олтарів, авторів стінных розписів, а в четвертым поміщено вельо придатных інформаций, напр. як чытати даты ци скорочыня на іконах в церковно-славяньскым языку ци інчы інскрипциі.

Автор книжкы, Ярослав Ґємза, єст выдатным знавцьом церковной штукы, од 25 років єст кєрівником Одділіня Церковной Штукы при Музею Замку в Ланцуті, автором десяток дописів про церковну штуку ци редактором вельох науковых робіт, тыкаючых церковной штукы.