Перша платня Терочкы уж до придбаня

Перша платня Терочкы – молодiжного ансамблю Руской Бурсы в Ґорлицях – вказала ся уж кінцьом минулого рока, а докладнi 18. листопада/новембра 2016 р. Выдано єй завдякы дотациі Мiнiстра Внутрiшніх Справ i Администрациi. Поміщено на ній 13 спiванок, в тым 11 народных i двi авторскы, до котрых слова i музыку написал Петро Мурянка («Зозулi» i «Горы, нашы горы»). Векшiст спiванок была зааранжувана i згармонiзувана через кєрівника ансамблю – Андрия Трохановского.

Награня платнi одбыло ся 5. мая 2016 рока. За студийо послужыла саля в Рускiй Бурсi в Ґорлицях, а до студийной сесиі заанґажувала ся векшiст членiв ансамблю. Реалiзацийом награня, мiксом i мастерiнґом занял ся Павел Малецкiй. Окладинку запроєктувала Наталiя Малецка-Новак. На платни мож найти спiванкы выконуваны через цiлий ансамбль, але тiж сольовы партиi і дуеты. Почути мож звукы басiв, гушель, акордеону ци ґiтары і, бодай лем думками, перенести ся на Лемковину.

Думам, же то велика радiст, не лем для членiв, але предовшыткым, для кєрівника ансамблю, котрий вкладат в його дiяльнiст дуже серця i працы. Андрий Трохановскiй перенял Терочку в квiтни/апріли 2014 рока. Орґанізує концерты, на котрых ансамбль презентує свій репертуар і в тот спосіб пропаґує нашу культуру. Вчыт вiн тых молодых люди лемківскых спiванок, власной аранжациi i гармонiзациi. Терочка мiстит в своiх кругах особы в рiжным вiку, од наймолодшых аж по студентiв. То фурт розвиваюча ся ґрупа. Што деякій час доходят до ней новы члены. Може тых молодых люди притiгат охота познати другых, а може як раз любов i привязаня до нашого фольклору.

Сам ансамбль оснований был в 2008 роцi през Андрия i Галину Малецкых. Початком был дiтячым ансамбльом, од 2010 рока до вересня/септембра 2011 р. веденым Андрийом Малецкым. Пак, в 2012 р. кєрiвничком остала Сусанна Яра. Ансамбль вюл тiж Славомир Трохановскiй в 2013 р., а вкiнци перенял го Андрий Трохановскiй, ведучы ґрупу дотепер.

Терочка має на своiм контi уж вельо концертiв. Рiк-в-рiк вказуют ся на ватрi в Михаловi, выступували на креницкым Бієнале, фестівали Молода Лемковина, мож было iх видiти на iмпрезi «Од Русаль до Яна» в Зындрановій. Дали концерт в Театрi Словацкого в Краковi. Свій репертуар презентували тіж на імпрезі „Wrzosowiska” в Пивничній. Влони выступили на Русиньскым Фестiвали в Свиднику, а в лiтнiм періоді, враз з ансамбльом Ластiвочка, поiхали i презентували лемківску культуру в Сербii i Хорвациi. Окрем того, початком 2017 рока, Терочка мала чест заколядувати на краківскым Головным Рынку в рамках Перегляду Колядничых Ґруп. Головнi же ансамбль прикрашат iмпрезы, проходячы в Рускiй Бурсi.

Выдана недавно платня єст доказом іх працы. Зато горячо заохочаме до купуваня. Мож єй набыти в Рускiй Бурсi в Ґорлицях, або замовити в нашым інтернетовым склепі – за тим мотузком. Кошт платні то лем 30 зл.