«Слово» – Святого Василiя – неділя, 9.00 год.
В тых днях празднуєме память великого світильника Церькви, отця выходного монашества, архієпіскопа Кесарії св. Василія. Своє дітинство пережыв в Неокесарії в области Понту. Од свойой бабкы Макріны чув о великых подвигах святых мучеників в часі пронаслідованя. В його сердці родить ся жыва і горяча любов ку Богу. Зо стороны отця – штатного урядника, і професора реторікы принимать основы світьской мудрости ку котрій так само запалює ся штудіями в Кесарії, Константінополи і Атенах. По скінчіню оддавать ся цальком світьской славі і карьєрі. Но на напомянутя свойой сетры мінить свій жывот, одходить познавати жывот монахів і вертать ся іншый чоловік, зохаблять нелем світьску карьєруно і богатство і зачінать жыти монашескым жывотом. Но Бог його кличе як вірного раба до обороны Церькви перед аріянізмом. Св. Василій ставать ся архієпіскопом Кесарійскым, стоїть вірно на стороні Бога. Не дасть ся ани купити обіцянками ани застрашыти грозьбами з боку імператора і його урядників. В тім і про нас є прикладом, жебы нихто сі не говорив: я ся уж не можу змінити, уж є пізно про мене. Смотьме на Василія, якый быв перед тым, веце як половку свого жывота прогайновав зганяням ся з мудростьов світа. А яка зміна у нього наставать. Далше смотьме на його велику любов ку Богу, про котрого жыє по своїм обернутю, на то, як не робить компромісы з тым світом. А духовне посолство, котре нам зохабив св. Василій: Вшытко (кажде слово, кажде діло) робити якбы на Божых очах і робити на Божу славу. Приймийме і мы тото його посолство, наслідуйме в тім тот великй взор, котрый нам св. Церьков ставить перед очі. Слава Ісусу Хрісту!
В неділю, 15-го януара 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15-го януара о 12.00, 15.00, 20.00 год. і 16-го януара о 2.00 год. за русиньскым часом.
Фото – св. Василій Великий (Wikipedia).
ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Повязаны дописы
Ґорлиці 106,6 MHz
