Нова «Маґура» – о жуках, мышпергачах і Різдві на Лемковині

На сайті Маґурского Нацийонального Парку мож найти найновший номер, 1(7) січен-марец 2017, квартальника пн. «Маґура» – бюлетину Маґурского Нацийонального Парку.

Заінтересуваны карпатском фльором і фауном найдут в ним вельо цікавых дописів, м.ін. обшырну статю Павла Німця про жукы жужелиці (лат. Carabidae), про мышпергачы Маґурского Парку написали: Кжыштоф Пікса, Томаш Бжусковскі і Войцєх Ґубала, о туристичній оферті Ґміны Осєк Ясєльскі написала Марта Лаба. Обшыр МНП в цілости находит ся на Лемковині, маючы тото на увазі в каждым номері «Маґуры» поміщаний єст тіж даякій допис повязаний з Лемками і іх земльом. Тым разом єст то статя Станіслава Спрінґера про різдвяний піст, козыбратів і дідухів, значыт про свята на Лемковині.

Часопис «Маґура» то публикация, яку задумано як лучник медже Маґурскым Нацийональным Парком, а вшыткыма особами ци інституциями, для котрых природа і сусідство з Парком не сут обонятны. «Маґура» мат за задачу приближыти чытачам проєкты і діяня реалізуваны і підниманы Парком, якых цілю є захороніня природы, як і поділіня ся спостережынями і досвідчынями працівників Парку.

Часопис «Маґура» в друкуваній версиі кольпортуваний є безплатні в семох ґмінах, на обшыри котрых находит ся Маґурскій Нацийональний Парк, та в Едукацийным Осередку МНП в Крампній. В електронічній версиі мож побрати го зо сайту парку magurskipn.pl за тым мотузком.

Фот. выімок з найновшого номеру «Маґуры».