В Катовицях будут бесідувати про Лемків на Шлеску

17. січня/януара Містецка Публична Бібліотека в Катовицях просит на прелекцию пн. Лемкы на Шлеску і в Польщы. Істория і сучасніст. Доповід выголосят др Божена Пацтва і др габ. Марек Дзєвєрскі з Інституту Социйолоґіі Шлезского Університету в Катовицях. Початок стрічы то 17.00 год.

Стріча буде проходила в рамках більшого проєкту Містецкой Публичной Бібліотекы пн. Вельокультуровий Шлеск. Проєкт был зачатий в 2016 році, будучы цикльом стріч, котрых цілю являт ся приближыня соспільности Шлеска етнічных і реліґійных меншын, жыючых на обшыри Выжнього Шлеска. До спілпрацы при ініциятиві прошены сут особы, якы репрезентуют м.ін. шлезскы культурны інституциі, реліґійны інстутициі, позаурядовы орґанізациі ци особы занимаючы ся темом меншын. Піднята Бібліотеком акция має як ціль пошану для культуровой ріжнорідности, освободжыня єй од стереотипів. Елімінувати упереджыня до осіб інчой нациі, реліґіі та збільшати свідоміст і знаня соспільства.

Тыжден скорше як прелекция, од 10. січня/януара мож выдіти в Бібліотеці выставу пн. Єм одтале. Польща вельох народів. То выстава зрыхтувана Стоваришыньом Польско-Німецкій Центр в Кракові та Домом Анны Франк в Амстердамі. Выстава посвячена єст істориі, культурі та сучасности нацийональных і етнічных меншын в Польщы. Выставу выдіти мож до 10. лютого/фебруара т.р. в Містецкій Публичній Бібліотеці (Filia nr 11, Grażyńskiego 47, Katowice).