«Слово» – Рождествo Хрістово – неділя, 9.00 год.

З Божой благослодати можеме знова праздновати прекрасный праздник Рождества Хрістового. Євангеліє нам говорить о навщіві трьох маґів, котры кідь увиділи надзвычайну звізду, ідуть за ньов, аж приходять до Віфлеєму. Тропарь праздника нам говорить о маґах як о тых, котры ся кланяли звіздам, їм служыли як богам, од них очековали, коли будуть мати щастя, і коли нещастя, были в рабстві звізд, астролоґії. Они кідь приходять до Ізраїльской землі, наперед го глядають в Єрусалимі, жебы там поучены писмами пророків і высланы царьом Іродом ішли го глядати до Віфлеєма. По выході з Єрусалима суть знова веджены звіздов аж ку вертепу. Там ся кланяють новонародженому Царьови, оддавають му свої дары і іншов дорогов ся вертають, наставлены ангелом, до свойой землі. І мы, кідь сьме спознали правдивого Бога, котрый з любви ку нам зыйшов на Землю як маленька дітинка, про наше спасіня, не вертайме ся назад до рабства (а то може і звізд – гороскопы, астролоґія, маґія а далшы практікы) гріха, діявола, але ідьме по тій іншій дорозі, дорозі віры в Божого Сына, дорозі вірности Його слову, Його заповідям. І так жычу вам вшыткым радостны благословлены, покійны, любвов і внутрішньов свободов наповнены свята Рождества Хрістового. Хрістос раждаєтъся!