В сканзені одслужать на Богоявленіє літурґію

В ґрекокатолицькій деревяній Церькви св. Михаіла Архістратига, котра находить ся в сканзені в Старій Любовні, на праздник Богоявленія за ґріґоріяньскым календарьом одслужать літурґію, інформовав о тім словацькый денник Korzár. Свята літурґія в церьковнославяньскім языку зачне в пятніцю 6-го януара 2017-го року о 13.00 год.

Частьов святкованя буде і обход коло храму з іконов св. Михаіла Архістратига, котрому є церьков присвячена. О вынятковость і автентічность святкованя літурґії постарать і мужска співацька ґрупа Шамбрінці зо Шамборна, котра своїм автентічным співом на веце голосів потішыть участных, інформовала далше денник Еріка Шалатова, выконна директорка Областной орґанізації турістічного руху Северный Спіш – Пєнины.

Деревяна церьков в старолюбовняньскім сканзені належыть міджі найціннішы експонаты. Вєдно з ньов суть там в експозіції і далшы будовы, котры походжаять з русиньскых і нерусиньскых сел реґіону.

Церьков св. Михаіла Архістратига

Храм походить із села Матисова є быв збудованый в другій половині 18-го столітя. Ремонтованый быв році 1938. По тім, што быв у 1973-ім році в селі збудованый новый храм присвяченый свв. апостолам Петрови і Павлови, деревяна церьков была перевезена до сканзену в Старій Любовні.

Храмовый обєкт є дводілный, трипросторовый із трьома вежами і хрестами. Даколи ся в головній вежі находили три дзвоны, но тоты были перенесены до новой церькви в Матисовій іщі перед тым, як деревяну церьков перевезли до Старой Любовні. Іконостас походоть приблизно із 18-го столітя.

В церькви ся традічно служать літурґії лем на великы свята. Іншак служыть лем як експонат выставльованой експозіції сканзену. Шторік одслужыть ся там літурґія і в рамках фестівалу, котрый робить Русиньска оброда на Словеньску під назвов Славности Русинів під градом.