«Слово» – Неділя св. Отців – неділя, 9.10 год.

Остатня неділя перед Рождеством ся называть Недільов святых Отців. В тот день ся чітать євангеліє од Мафтея о родослові Ісуса Хріста. Дахто сі повість, якый хосен із того довго списку імен, о котрых може ани не знаме. Но кідь присмотриме ближе, можеме почерьпнути із того великый хосен. Уж на початку говорить ся, же Хрістос є з роду Давіда. На тото ся одкликовали Жыде в частых спорах з Хрістом односно його походжіня з Назарета. Далше в тім родослові маме много особ, котры были блудниками, грішниками, ці тоты самы особы як Давід указують приклад святого жывота, но і паджіня до гріха, але і покаяня. Далше нам то указує на велику любов Хріста, котрый не брыдить ся зыйти і дотулити ся смердячіх ран людьского гріха, жебы подати лік і выздоровліня. Так само указує нам днешнє євангеліє жебы не хвалити ся предками, або не ганьбити ся за них. Як маме святых предків, але не наслідуєме їх, не є з того ниякого хосну, а з другого, боку як маме грішных предків, але мы не наслідуєме їх в їх гріхах, не є з того про нас ниякой шкоды. Про нас є важным то, жебы жыти подля Божых заповідей, бо каждый за себе буде оддавати слово перед Богом. Слава Ісусу Хрісту!