Варят в Рускій Бурсі – предріздвяна стріча

Част Русинів світа єст уж по Різдвяных Святах, але ціла Лемковина іщы жде на тот великій праздник. Незалежні од того, Руска Бурса в Ґорлицях як каждого рока просит вшыткых охочых на предсвяточну стрічу, котра одбуде ся днешнім пополудньом (четвер, 29. грудня/децембра 2016 р. ). Так для тых, што уж не мусят постити, як і для тых, што іщы находят ся в періоді Филипівкы, напевно смачны будут грибы, капуста, горох, кєселиця і ін. – т.є. вшыткы традицийны стравы, котры являют ся на лемківскых столах в Святий Вечер.

Хоц спільна вечеря з прібуваньом велийных страв і співаньом коляд зачне ся пополудньом о 16.00 год., до Руской Бурсы уж од самого рана сходили ся полазникы і ґаздыні, понеже ліпліня перогів, варіня капусты, рыхтуваня прикрасок на яличку (і пізнійше єй прибераня) являт ся необхідным елементом каждорічной предріздвяной бурсяной стрічы.

Красні просиме прити до Руской Бурсы, жебы разом побыти, поколядувати, зо щырым серцьом зрыхтувати ся на великій праздник Рождества Ісуса Христа. Пару знимок з днешнього рыхтуваня велиі найдете долов, а як было в попередніх роках, можете посмотріти в ґалериях знимок з нашого порталю (2014 і 2015 р.).