Лемківска коляда на краківскым рынку

Як напевно нашы любителі знают, Стоваришыня Руска Бурса в Ґорлицях што рока орґанізує Перегляд Колядничых Ґруп. Запрашаны сут товды переважні учытелькы зо шкіл ґорлицкого повіту (хоц не лем, бо зголосити може ся каждий зо свойом ґрупом), де ведене є вчыня лемківского языка, жебы зо своіма учениками представити святочний проґрам, т.є. популярний Вертеп.

Того рока єднак ситуация є нетипова. Нашы малы артисты выізджают з лемківском колядом аж до Кракова. Стоваришыня Руска Бурса отримало запрошыня од Краківского Вытворчо-Услугового Предприятя «Артім», котрого головным закресом діяльности є: орґазнізация торгів, кєрмешів, пленеровых імпрез, наниманя ярмакового ґратя разом з обслугом, вынаєм шатр, зовнішні реклямы. Імпрезом якы орґаніує фірма «Артім» товаришат артистичны выступы, котры мают на ціли сперати автентичны непрофесийональны ансамблі, особливо вказуючы традицийний фольклор реґіону, народны обряды як тіж молодіжны і дітячы ансамблі. Ціла імпреза одбуде ся 3. січня/януара 2017 р. о 13.00 год. торжественным короводом святочных лемківскых колядників през краківскій Головний Рынок, а пак ґрупы – а того рока буде іх сім – запрезентуют ся не сцені.

Вшыткы барз ся тішыме на тот выізд. Є то великій успіх, же наша меншына як єдина буде могла вказати свою культуру жытелям Кракова. Ціла артистична част буде очывидно по лемківксы. Надієме ся, же краківяне позитивні і горячо приймут нашых лемківскых акторів. Презентувати ся будут діти і молодіж з предшколя, основной школы, ґімназиі і середньой школы. Рахуєме на гарду хвилю, а дрібнці з подіі разом з обшырном ґалерийом знимок представиме неодолга на нашым портали.