В Варшаві зачало ся LVIII засіданя СКУтНіЕМ

В Варшаві, в будинках Міністерства Внутрішніх Справ і Адміністрациі Польской Республикы, по 9.00 год. зачало ся посліднє того рока засіданя Спільной Комісиі Уряду та Нацийональных і Етнічных Меншын, о котрым заявляли сме вчера на нашым портали.

Посеред головных пунктів стрічы, якы заплянуваны на днес, находят ся темы з обшыри поділу дотаций на охорону, підпору і розвиток культуровой достоменности меншын і реґіонального языка на 2017 рік, стріча з представниками Аґенциі Внутрішньой Безпекы (Agencja Bezpieczeństwa Wewnętrznego), орґанізация прац Спільной Комісиі в 2017 р., омовліня законів о реформі едукациі і Інституті Нацийональной Памяти, та другы темы.

Днешньому засіданю – як спілведучы Комісиі – проводят Себастиян Хвалек, віцеміністер внутрішніх справ і адміністрациі, і зо стороны меншын Рафал Бартек, представник німецкой меншыны. Присутны сут тіж експерты, беручы участ в засіданях ґрантовой комісиі і урядникы Департаменту Віроісповідань та Нацийональных і Етнічных Меншын МВСіА та другых урядів.

З кулюаровых бесід уж дознали сме ся, же – інакше як по інчы рокы – до представників меншын, котры уж вчера засідали на стрічы меншыновой стороны СКУтНіЕМ, іщы не дотерла інформация о поділі дотаций на 2017 р. О тій і о інчых підниманых днес темах будеме іщы інформувати на портали lem.fm.