Різдвяны реколекциі БПМ Перемышльско-Ґорлицкой Єпархіі

В днях 26.-28. грудня/децембра 2016 р. одбудут ся православны святочны реколекциі, орґанізуваны членами Братства Православной Молодежы Перемышльско-Ґорлицкой Єпархіі. Реколекциі будут проходити в горах, молодіж буде іздила по лемківскых парохіях в Ґладышові, Высовій, Ганчовій і Реґєтові. Є то добрий час, в котрым мож хоц на хвилю пристанути, одгородити ся од штоденного поспіху, посвятити цілком Богу, выполнити своє сердце молитвом. То, як раз, головна іх ціль – задумати ся над своім жытьом, зближыти через молитву до Бога. Але, окрем того, через спільну молитву, бесіду ци забаву, реколекциі дают можливіст інтеґрациі з інчыма молодыма людми і при нагоді познати новий заряд БМП Перемышльско-Ґорлицкой Єпархіі.

Был він совершений 19. листопада/новембра т.р. в Саноку. Там же, з благословліня єпископа Паісия, одбыло ся загальне зобраня Братства. Выбрано новий 9-особовий заряд, котрого духовным опікуном остал о. Юлиян Феленчак. На челі БМП станула Мария Феленчак, а єй заступцями остали Аркадий Бараньчук, Владимір Терлецкій і Беата Клая. В склад заряду входит тіж скарбник, котрым є Александер Клинковскій, секретар – Дария Мельник, а членами остали Богдан Марчак, Михал Феленчак і Александер Мокрауз.

Реколекциі зачнут ся в понедільок, 26. грудня/децембра. Зъізд одбуде ся в Ґладышові, де молодіж закватерує ся в осередку «Елеос», потім сяде до спільной вечері. Пак заплянуваны сут вечерні молитвы і приготовліня до таінства сповіди. О ден (27.12), на 9.00 год. передвиджений є выізд автобусом до церкви в Высовій. Гын одбуде ся сповід, а о 10.00 год. зачне ся Свята Літургія. По молитві, молоды люде выйдут на Святу Гору Явір, де одслужений буде молебен. Тым разом буде то тіж змога подивляти святу гору в меньше знаным виді – пристроєну в зимове облечыня. Дальшым етапом реколекций має быти звиджаня церкви в Ганчовій, а пак – близко 16.00 год. – поворот до Ґладышова. В тот же ден одбуде ся стріча з о. ігуменом Пафнутийом на тему Свята Гора Афон і єй значыня для Святого Православя, вчас котрой буде вказаний фільм, навязуючий до темы афоньской горы. По обідовечері молоды люде будут мочы інтеґрувати ся при бесідах о жытю в Церкви. На остатній ден реколекций (середа, 28.12) плянуване є звиджаня і молитва в церкви в Реґєтові. Цілы реколекциі закінчыт спільна прогулька на санях. Як заповідают організаторы, кошт участництва єст безплатний.

Реколекциі будут проходити в свобідным од наукы періоді, зато орґанізаторы горячо запрашают взяти участ. Більше інформаций мож найти за тым мотузком.